FAQ
Search
Members
Groups
Register
User Control Panel
Log in to check your private messages.
LoginLA RADIO N'ASTURIANU CUMPLE VENTE AÑOS
Moderator: Moderators
LA RADIO N'ASTURIANU CUMPLE VENTE AÑOS
La radio n'asturianu cumple vente años
Radio Sele ye la radio d'Asturies pionera n'emisión en llingua asturiana y esti añu 2006 cumple los vente años d'emisión dafechu n'asturianu. El director y fundador de Radio Sele, Xuanxo Mariño, siente l'enfotu de llevar esti llabor otros vente años más y pa ello piensen celebrar esti feliz aniversariu con una gran espicha esta próxima seronda. Los primeros programes entamaron a emitise en febreru de 1986, realizando la emisión dafechu n'asturianu. Anguaño siguen col retu de la plena normalización social de la llingua asturiana. L'enfotu, trabayu y procuru polo que consideren un drechu fundamental de les persones son los sofitos que guiaron tou esti tiempu nesta xera de la comunicación.
Munches fueron les persones que pasaron pelos estudios de Radio Sele, abondos los momentos prestosos y asgaya los oyentes que se comunicaron per Radio Sele, la llingua nes ondes. Pasu ente pasu, Radio Sele foi medrando como radio llibre hasta algamar nel añu 1999 la llicencia comercial concedida pol Gobiernu Asturianu de Sergio Marqués, que va permitir afrontar esti retu d'un mou más profesional y satisfactoriu, tou ello a pesar de ser una radio perseguida políticamente pol señor Vicente Alvarez Areces, qu'intentó pesllar la emisora igual que nos vieyos tiempos del franquismu o del estalinismu.
Radio Sele aporta a les principales ciudaes d'Asturies, como son Uviéu, Xixón, Avilés, La Pola (Siero), Mieres, Llangréu, con una población total d'unes 800.000 persones y emite dende Uviéu pel dial 106.5 de la FM. La dignidá, autoestima y reafirmación de les señes d'identidá del pueblu asturianu a través de la so llingua y cultura ye la garantía de la pluralidá y respetu universales. Poro, Radio Sele cree qu'Asturies necesita una radio que fale na so llingua pa garantizar estos drechos universales y fundamentales y por ser, amás, el principal valor de la cultura d'un país como Asturies. Radio sele amás puede sentise'n tol mundu per Internet pela seña www.radiosele.net que tamién acaba de remozar la so páxina y conteníos pa celebrar estes dos décades de radio n'asturianu.