ASTURIAN NATIONAL HOCKEY TEAM WON SWITZERLAND 3-2

People, history, places, resources, & more.<br>
El pueblo, historia, lugares, recursos, & más.

Moderators: mariamatoyos, Moderators

Post Reply
astúricu
Posts: 164
Joined: Sat Jun 28, 2003 12:39 pm

ASTURIAN NATIONAL HOCKEY TEAM WON SWITZERLAND 3-2

Post by astúricu »

La selección nacional asturiana de hoquei ganó a la de Suiza por 3-2



El palaciu los deportes de Grau vió una vegada más una victoria d'una selección nacional asturiana deportiva, nesti casu la de hoquei en patinos. El deporte asturianu demostró una vegada más que, de poder competir a nivel oficial, nun diba tener problemes en facer papeles más que dignos. La selección nacional d'Asturies d'hoquei en patinos dio, ésti miércoles 27 d'avientu en Grau, una auténtica llección a Suiza, l'actual subcampeona d'Europa delantre d'un polideportivu que colgó'l cartel d'enllenu dafechu. El nuesu combináu nacional, anque entrenó durante una hora el día enantes del partíu, foi mui superior a los helvéticos. La falta de xuntura y de puntería asturiana, asina como la gran defensa y actuación del porteru suizu, ficieron que'l resultáu nun faiga xusticia a lo que pudo ser una goleda mayor. Nel minutu 13 Esteban Guerra punxo'l 1-0 nel marcador, faciendo Brentini de penal un 1-1 trés minutos depués. Keko, nuna bona xugada nel 18, y el mesmu Brentini nel 21, ficieron que al descansu se llegara col empate a 2-2. El dominiu asturianu nel segundu tiempu foi ablucante, pero a pesar d'ello namás a dos minutos del final consiguió Asturies el 3-2, marcáu por Estanis de penal consiguiendo la primer victoria del nuesu combináu nacional de hoquei en patinos. Na única comparencia anterior, los asturianos perdieren nel 2002 por 3-4 ante Portugal. Cuatro años depués a Asturies llegaba-y ante Suiza la fortuna que-y faltó daquella.


--------------------------------------------------------------------------------



Anabel Santiago, Premiu CPN a la Meyor Canción n'Asturianu del 2005


Anabel Santiago entamó cantar como profesional a los 14 años pero siempre recuerda cantar dende nena sintiendo les canciones de so güela. Durante 10 años foi ganando tolos concursos d'asturianada, esti vieyu y fuerte estilu musical tán identificáu cola cultura asturiana y cola asturianidá. Nun entamu sólo la cantaben homes pero nel sieglu XX abondes muyeres y homes ficieron de l'asturianada un xeneru musical únicu nel mundu. Dende'l so primer discu "Al son de la lluna" Anabel Santiago yá fizo por renovar la tonada asturiana adaptándola al nuevu tiempu, a les nueves sonoridaes y esperimentando con éxitu con un xéneru tán tradicional que se ñegaba inclusu a la so propia evolución y desenrollu. Les abondes grabaciones permiten yá que l'asturianada tradicional nun se pierda y que pasín a pasu, la tonada asturiana garre'l so propiu camín musical camudándose nun xéneru que se refai a sigo mesmu y que nél mesmu s'inspira, evoluciona y algama nuevos y mayores mercaos y públicos. Nel so caberu discu Anabel Santiago fai una apuesta clara pola evolución de l'asturianada, axuntando la so perguapa voz con magníficos arreglos al pianu de Jacobo de Miguel averaos al estilu del jazz, y al xeitu de los lieder románticos alemanes y faciendo amás un homenaxe a una de les cantantes clásiques de l'asturianada como ye Diamantina Rodríguez y los sos tradicionales temes. Tradición y modernidá, veteranía y mocedá son los ingredientes d'esti canciu númberu cuatru del discu, Añada amorosa, Premiu CPN a la Meyor Canción n'Asturianu del 2005, que marca'l camín a siguir pa facer de l'asturianada una música n'asturianu y universal. El compromisu d'Anabel Santiago cola llingua asturiana y cola so oficialidá ye del cien por cien y siempre lu manifiesta asina nes sos entrevistes nos medios de comunicación. Norabuena, Anabel Santiago.
Image
Post Reply

Return to “About Asturias - Sobre Asturies”