FUELGA NA ENSEÑANZA ASTURIANA POLA SITUACIÓN DEL ASTURIANU

[astúricu]

Convocada fuelga na enseñanza pal día 22
pola situación del asturianu

La Xunta Moza va convocar xunto con otres organizaciones una nueva fuelga pola situación represiva que sufre l’asturianu n’Asturies, pal día 22 de marzu del 2007. La penosa situación de la llingua asturiana na enseñanza ye la causa de la convocatoria d'un paru xeneral nel sistema educativu asturianu pal próximu día 22 de marzu. Xunta Moza convoca la fuelga en respuesta a la nueva agresión que supón la propuesta de currículu de la Conseyería d'Educación, na que s'afonda na situación marxinal de la llingua asturiana nel sistema educativu. El paru va tar acompañáu por una concentración a la una del mediudía na Plaza d'Hespaña. La Xunta Moza, estaya de mocedá de la Xunta pola Defensa de la Llingua Asturiana, fizo pública la convocatoria de la fuelga na enseñanza asturiana en rempuesta a la nueva agresión que supón la propuesta de currículu de la Conseyería d'Educación pa secundaria, qu'afonda na situación yá marxinal de la llingua asturiana nel sistema educativu. La convocatoria de paru xeneral nos institutos de secundaria asturianos, que ta puesta pal día 22 de marzu, va acompañada d'una concentración.
La Xunta Moza quier adelantase cola fecha de la convocatoria a la fecha prevista pa qu'Educación asoleye'l curriculum de secundaria, calteniendo asina la presión sobre l'organismu responsable de polítiques educatives d'Asturies dempués de la manifestación del pasáu 17 de febreru contra'l borrador de currículum d'enseñanza primaria, nel que l'asignatura d'asturianu apaecía prácticamente como una optativa en competencia con otres materies curriculares. Xunta Moza yá organizare nos últimos años dos fuelgues na secundaria asturiana en defensa d'una situación más decente pa l'asignatura de llingua asturiana. Dende la organización entienden qu'esta vegada hai más motivu p'aparar institutos. La Xunta Moza confía na posible xuntura na convocatoria d'otres organizaciones como'l sindicatu d'estudiantes y organizaciones de partíos asturianos.
Los sindicalistes Beatriz Quirós, del sindicatu d'enseñanza SUATEA y Jesús de la Roza, recibieron esta selmana una denuncia del Cuerpu Nacional de Policía acusándolos de desbediencia nel marcu de la protesta que fexeron estudiantes y profesores contra’l presidente asturianu Vicente Alberto Alvarez Areces contra la so decisión de ceder d'espacios na Universidá Llaboral a la empresa Thyssen-Krupp que tuvo llugar na inauguración, el pasáu 16 de xineru, de la Escuela Superior d'Arte Dramáticu (ESAD). Na denuncia acúsase a Beatriz Quirós y a Jesús de la Roza de francer el cordón policial que resguardaba a les autoridaes participantes nel actu y a ñegase a dar el DNI. La sindicalista desconoz pel momentu la multa o castigu que se-y pide, pero nun dexa de comparar la so situación, salvando les distancies, cola de los sindicalistes de CSI Juan Manuel Martínez Morala y Cándido Carnero. La portavoz de SUATEA, el sindicatu más improtante de la enseñanza n’Asturies, negó toles acusaciones que se faen contra ella y de La Roza y denunció que la policía nun-y quixo almitir el carné de conducir como mediu válidu pa identificase cuando ella alvirtiere que nun disponía de DNI porque-y lu robaren. Too ello vien como consecuencua d’una política represiva contra los sindicatos llevada alantre pol actual gobiernu asturianu del PSOE-IU.