AXENCIA CPN - NEWS AGENCY IN ASTURIAN LANGUAGE

[astúricu]

CPN

--------------------------------------------------------------------------------


Activistes de la llingua galesa ocuparon hamburgueseríes
americanes como protesta

La Xunta pola Defensa de la Llingua Galesa llevó alantre una campaña de protesta consistente na ocupación pacífica de delles hamburgueseríes norteamericanes nel Principáu de Gales. Ello yera parte d'una campaña pa llamar l'atención pol nulu usu de la llingua galesa por parte de les grandes multinacionales. En concretu, denuncien que Burguer King non sólo nun usa productos autóctonos yá quer too ye importao dafecho de los EEXX y manquen asina los negocios locales. Les protestes más llamatives fixéronse delantre les hamburgueseríes, glayando contra la globalización y l'armamentismu belicista dientro d'una nueva estratexa de los grupos de defensa de la llingua pa non concentrar les reivindicaciones sólo en aspectos llingüísticos pa amplialo a temes más xenerales pero relacionaos indirectamente colos procesos de recuperación llingúística que puean averar a más xente al movimientu reivindicativu de la llingua galesa.
L'ausencia de la llingua galesa nos menús de comida rápido asina como la desconocencia del galés pola mayor parte de los emplegaos del negociu fai que los falantes de galés se sientan marxinaos ya escluíos nel so derechu a emplegar la llingua galesa nes sos relaciones comerciales con esti tipu d'empreses multinacionales. A pesar de la esistencia d'una Llei de la llingua galesa, ésta sólo obliga a les alministraciones públiques a tener unes polítiques billingües pero nun diz nada de los derechos respecto a empreses privaes d'atención al públicu o a los consumidores. Asina, quieren reformar la Llei pa obligar al sector priváu a facer polítiques tamién billingües y non escluyentes pa col galés.
La protesta pacífica consistió tamién n'entamar unes espiches improvisaes enfrente de les hamburgueseríes aportando productos caseros y autóctonos con pancartes alusives pa protestar comiendo.
Munches compañíes privaes rechacen el galés por consideralo "minoritario" y ello supón que muncha xente nun pue usar el galés en situaciones de la vida diaria. La Xunta galesa tamién denunció aquellos establecimientos financiaos con dineru públicu como atracciones deportives o museos que nun usen la llingua galesa nin permiten la escoyeta d'usar el galés. Los estudios señalen que l'usu de la llingua galesa atrae más y nuevos clientes.
La nueva campaña de reivindicar el galés atacando a les multinacionales podría afectar a más empreses nel futuru non sólo a les hamburgueseríes pol dañu que producen non sólo a la llingua sinón tamién a la economía galesa y por ello confíen n'atraer más apoyos de xente que normalmente nun se mobiliza sólo pola llingua sinón por aspectos como la economía o l'antiglobalización.


--------------------------------------------------------------------------------



El foru européu de la cultura debatió sobre les llingües menores

Los derechos de les llingües menores, ente les que s'alcuentra la llingua asturiana, foron el focu de la conferencia entamada pol Colexu d'Europa en Bruxes (Bélxica). Fernand de Varennes de la Universidá de Murdoch-Australia criticó a la Xunión Europea por ser incoherente ya hipócrita pa coles minoríes llingüístiques d'Europa ya que per un llau defiende con puxu los derechos de los falantes de la llingua kurda en Turkía pero nun defiende con igual puxu los derechos des los falantes d'otres llingües minorizaes dientro de los propios estaos miembros de la XE. Con ello paez que pa entrar na XE esíxense unos niveles de derechos pa les minoríes llingüístiques qu'una vegada dientro de la XE paez que ya nun s'esixen o s'olviden en países miembros como Grecia o Hespaña que nun respeten los derechos llingúísticos de los sos ciudadanos, en concretu los derechos de los falantes de la llingua asturiana. El respetu a los derechos humanos llingüísticos que tien que garantizar la futura Constitución Europea ayudará a crear un ambiente onde les minoríes se sientan segures ya qu'una verdadera sociedá democrática tien que respetar les minoríes y les sos diferencies culturales y llingúístiques. Tamién llamó a facer de la diversidá llingüística y cultural una obligación llegal.
Bojan Brezigar, Presidente de la Oficina Europea pa les Llingües menores EBLUL www.eblul.org afirmó que nel futuru la Xunión Europea tendrá que firmar y declarar como obligatoria la Carta Europea de les Llingües Menores del Conseyu d'Europa. Vivianne Reding, Comisaria d'Educación y Cultura, afitó que si nel pasáu les polítiques qu'importaben yeren les referíes a la economía y a la industria nos debates de la XE, a partir d'agora el centru de los debates va ser la política cultural, la diversidá cultural y llingúística, y agora los poíticos tendrán que centrase en debatir estos asuntos.



--------------------------------------------------------------------------------



Proponen un programa d'apadrinamientos y una fundación
pa les Llingües Menores

La Xunión Federal de les Nacionalidaes d'Europa FUEN www.fuen.org fexo la so aportación al procesu de consultes de la Comisión Europea (Goviernu d'Europa) pal so plan de política llingüística. La novedá propuesta que cada estáu miembru apadrine o adopte una llingua menor o varies d'otru estáu miembru. Ello serviría pa sensibilizar los valores positivos de la diversidá llingüística. FUEN encamienta l'entamu d'una Fundación Europea que represente los intereses de les Llingües Menores d'Europa, ente les que s'alcuentra la llingua asturiana. La nueva Fundación tendría como oxetivu fortalecer y promover les llingües menores d'Europa, ente elles l'asturiana y el diálogu ente les llingües grandes y menores, ente les llingües oficiales d'Europa y aquelles que como l'asturianu, el bretón o'l catalán nun lo son. Los integrantes d'esta nueva Fundación sedríen les más importantes asociaciones de defensa de les llingües menores, los delegaos de cada llingua menor asina como representantes de la Comisión europea y de cada estáu miembru. El programa d'apadrinamientu consistiría por exemplu en qu'un país como Alemaña o Francia adopten a llingües foriates d'otru estáu miembru como podría ser la llingua asturiana o la galesa como llingües d'adopción y asina, los estaos alemán o francés habríen a promocionar y difundir estes llingües menores como parte de la so política estatal n'Europa, dales a conocer y difundiles dientro de les sos polítiques culturales a nivel estatal ya internacional.


--------------------------------------------------------------------------------



Denuncien al Goviernu Hespañol d'Aznar
por reimponer sólo el castiellanu nos servicios estatales

El goviernu conservador del estáu hespañol presidíu por José M. Aznar vien siendo denunciáu poles organizaciones de defensa de les llingües pola so política retrógrada consistente en volver a reimplantar l'usu esclusivu de la llingua castiellana nos servicios públicos del estáu hespañol, escluyendo y marxinando al restu de les llingües hespañoles non castiellanes, no que se considera una vuelta al pasáu más escuru de la vieya imposición obligatoria d'una sóla llingua, la de Castiella, lo que provocó nel pasáu ya inda sigue provocando güei una desafección al propiu estáu hespañol por parte de munchos ciudadanos non castiellano-falantes.
La Organicación pol Multillingüismu con sede en Barcelona entamó una campaña de denuncia contra la política de marxinación llingúística y d'imposición del castiellanu en tol estáu hespañol. A pesar que la Constitución Hespañola obliga al multillingúísmu y al reconocimientu oficial de toles llingües d'Hespaña, l'actual goviernu d'Aznar vuelve a incumplir el textu y l'espíritu constitucional tratando d'imponer una sola de les llingües al restu de la población marxinando al restu les llingües españoles como l'asturianu, catalán, vascu, gallegu y aragonés.
La compañía estatal, Correos y Telégrafos, tornó usar sólo el castiellanu cuando enantes usaba tamién el catalán, gallegu o vascu. En 2003, camudó la so imaxe corporativa ensin respetar les llingües hespañoles non castiellanes. Por ello, entamóse una campaña pa reivindicar la normalización llingúítica n'empreses como Correos, baxo l'eslógan "Correos plurales". Tamién se reclama que tolos documentos, páxines web, sellos y otros bienes postales o monedes, s'impriman en toles llingües d'Hespaña non sólo na castiellana. Recientemente el goviernu rechazó la posibilidá d'imprimir sellos en llingua asturiana cuando yera un pidimientu de tola Comunidá Autónoma unánime representada nel parlamentu asturianu.
La imposición del castiellanu sólo en compañíes como Correos, Renfe o Telefónica viola la lexislación vixente qu'obliga a estes compañíes a garantizar el billingüísmu como derechu constitucional. La nueva política monollingüe del goviernu hespañol d'Aznar manifiesta una menor o nula presencia de les llingües asturiana, catalana, gallega o vasca nos ámbitos competenciales del estáu hespañol. Nel ámbitu educativu impúsose la obligatoriedá d'una mayor carga horaria de la llingua castiellana pero non d'otres llingües hespañoles asina como una nueva imposición de temarios de la historia d'Hespaña nos manuales de textu basaos esclusivamente nuna sucesión temporal de los sos diferentes xefes d'estáu, igual que se fexo durante la dictadura del franquismu.



AXENCIA DE NOTICIES CPN

--------------------------------------------------------------------------------


L'AXENCIA DE NOTICIES CPN CUMPLE 4 AÑOS D'ESISTENCIA- GRACIES A TOLOS QU'APOYARON ESTA INICIATIVA MEDIÁTICA N'ASTURIANU

axenciacpn@wanadoo.es