L'añu emprecipiaba en marzu

Stories, rituals, customs, & more.<br>
Cuentos, rituales, costumbres, y más.

Moderator: Moderators

Post Reply
Ramón Sordo Sotres
Posts: 127
Joined: Tue Oct 06, 2015 4:49 am
Location: Llanes

L'añu emprecipiaba en marzu

Post by Ramón Sordo Sotres »

L'AÑU EMPRECIPIABA EN MARZU

Los meses del añu na nuestra lluenga tienen muchos nombres pero una retajila mui curiosa d'ellos, pa mí la más asturiana, e la que sintí en dellos pueblos d'Amieva: xineru [en Llanes, eneru], jebreru, marzu, abril, mayu, xunu, praos, agostu, setiembre, otubre, payares y avientu; estos nombres vienen de las dos culturas que tenemos, la romana y la de más antiguamente, y dícenmos meyor qu'otros cómo los antiguos veían el sol, la lluna, los meteoros, los llabores del campu y los díes señalaos.

Ello joi que l'añu los romanos escomencipiaba en marzu, no n'eneru como hoi: los cónsules emprendían a mandar el 15 de marzu y por ello era entós cuando entamaba el tiempu las campañas melitares.

Pero a cuenta la segunda guerra celtibérica, en 153 primero Cristo cambiaren el calandariu y l'añu pasó a empecipiar l'unu de xineru: asina el cónsul Quintu Fulviu Nobilior tevo más espaciu p'allegar col so exércitu jasta la ciudá de Sexeda, que taba cerca del Calatayud d'hoi y alluendi de Roma y qu'esi añu era la enemiga que tenían que machucar. Pero como mos gusta lo d'antiguamente vamos ver, en jilera, los meses del añu cola numeración antigua y col so nombre nel asturianu d'esti sen:

El mes primeru era el de marzu, en llatín MARTIUM, sustantivu que vien de Marte, el dios de la guerra.

APRILEM dio abril, qu'era el segundu mes. No ta claru d'onde salieren esti nombre llatinu y los de los dos meses de la primavera que van dempués d'elli: MAIUM, hoi mayu, y IUNIUM que dio xunu o xunu primeru.

El mes de QUINTILEM (o séase, 'el mes quintu') pasó a IULIUM pa emponderar a Xuliu César, qu'era nacíu nesti mes; equí llámase xunu segundu, xunu postreru, xunetu, xunucu (pallabras que vienen de xunu) o xuliu. Sin embargu el nombre más antigu d'esti mes era, nas oriellas del Sella, praos, paez que porque «era el tiempu l'herba».

Agostu vien d'AUGUSTUM, llamatu que-y ponió Augustu (l'herederu de César) cuando era l'amu de Roma porque esi mes metiérenlu de cónsul la primer vez (nel 43 p. C. con decinueve años lo que no era costitucional) y tamién porque n'elli ganó dellas batallas (una d'ellas a Marcu Antoniu quien jora el que proponió el nombratu de IULIUM), pero lo antigu era SEXTILEM, que quier dicir 'el mes númeru seis'. L'emperador que vieno dempués, Tiberiu, no quiso que ponieran el so nombre a dengún mes (Suetoniu, Sobre la vida los Césares, III, 26, 2).

Setiembre, de SEPTEMBREM: era el sétimu mes pero agora ta nel sitiu novenu. Y otubre (llamámos-y lo mesmu qu'en castellanu antigu), de OCTOBREM ('el mes ocho').

Noviembre vien de NOVEMBREM (el mes nueve) pero n'asturianu nómbrase tamién payares, asegún m'enteraren en Pen (Amieva) porque estóncenes «sembraban el pan» (n'asturianu, payar quier dicir «tierra de pan dempués de recollíu el cereal»). Como viemos tamién col mes de praos y vamos ver con avientu, tenemos nombres de meses romanos, nombres de meses asturianos y nombres de meses cristianos.

Dempués ta diciembre (de DECEMBREM, 'el mes diez'), llamáu tamién avientu, d'ADUENTUM, el primer tiempu l'añu llitúrxicu cristianu.

El mes once conozse por eneru o xineru, d'IANUARIUM, nombre que vien del dios Ianus.

Y l'últimu del añu era jebreru, de FEBRUARIUM, pallabra salía de FEBRUA, una junción de purificación de la Roma antigua.

Ramón
Post Reply

Return to “Folklore”