Niembru y la mar

People, history, places, resources, & more.<br>
El pueblo, historia, lugares, recursos, & más.

Moderators: mariamatoyos, Moderators

Post Reply
Ramón Sordo Sotres
Posts: 127
Joined: Tue Oct 06, 2015 4:49 am
Location: Llanes

Niembru y la mar

Post by Ramón Sordo Sotres »

NIEMBRU Y LA MAR

El pueblu del conceyu de Llanes que más arenales tien e Niembru (dempués vienen Jontoria y Celoriu); son, del poniente al saliente: L'Abedoriu (que no sé si e de Niembru, de Bricia o de los dos pueblos), La Torca, Portaquinos, Portacos, Torimbia-La Entrada (que los dos sitios, desapartaos por la Riega Torimbia, son un sable solu), Peñadrada, El Portaquín del Viveru, Sovalles, Valles, Toranda, La Barra y El Puertu.
Toranda tien hestoria, pues nos rexistros fiscales de Sancho IV de Castilla (1284 - 1295), ente los derechos del rei n'Asturias pal tiempu 1290-1292 apaez la ‘ballenación de Turanda’, que cada añu rentaba 2.400 maravedíes y que debe ser lo que llamamos hoi Toranda. Y d’esa ballenación (fábrica onde s’iguaban las ballenas pescadas) pudió salir, si dulce e un axetivu, el topónimu Jodulce, el más nombráu hoi de Toranda.
En Niembru bía muchos marineros, pos era unu de los pueblos del conceyu que más diba a la mar, asegún los papeles; podemos velo nel llibru que sacó va pocu Antonio Celorio Méndez-Trelles sobre ‘los antiguos mareantes de Llanes’.
Dellos vecines alcuérdanse (o alcordábanse) de que va siglos eran pocos los llabriegos de Niembru, casi tos eran marineros que pescaban el congriu pa vendé-ylo al Ayuntamientu de Llanes, pero vieno una galerna (según Emilio Pola, joi nel siglu XVII, frente al Cabu Mar, y taban pescando ballenas) y ajogárense, quedó el pueblu sin xente, solu con viudas y críos qu’andaban gritando y llorando. Entós los hombres quisieren más dir a la tiyera (como llaman en Niembru y otros pueblos llaniscos a la teyera, el nombre más corriente nel conceyu). En Pimiango (Ribadeva) pasó una cosa paecía, pero equí jaciérense mansoleas (zapateros).
Ente Peñadrada, El Portaquín del Viveru, Sovalles y Valles, ta La Talá, una llombina curiosina y atopadiza de 31 metros d'altu onde vese bien la mar pa dos senes; llámase igual qu’un llugar de La Villa mui nombráu, pero esti tien una torre y el de Niembru no.
Al poniente de Peñadrada podemos ver La Canal de la Ballena, un sitiu güenu pa pescar llamáu asina porque diz qu’antiguamente paeció nelli una ballena.

Ramón
Post Reply

Return to “About Asturias - Sobre Asturies”